60ка чыкмак… «Тазалыктагы» унаа коюп кеткен аял иш издеп Миң-Куштан келген

Тазалык» муниципалдык ишканасынын санитардык тазалоо боюнча улук мастери Нурлан Дөкөнов кырсык болгонго чейин бир саат эрте өзүнө тиешелүү аймактарын текшерип жүрүп, Айнура Султаналиеваны иштеп жаткан жеринен сүрөткө тартып кеткен.

«Тазалык» ишканасынын унаа коюп кеткен кызматкери Айнура Султаналиева 26-февралда 60 жашка чыкмак. Бул тууралуу Sputnik Кыргызстан агенттигине «Тазалык» муниципалдык ишканасынын санитардык тазалоо боюнча улук мастери Нурлан Дөкөнов билдирди.

Эске салсак, дүйшөмбү күнү эртең менен саат 7:30дар чамасында Бишкектеги Байтик баатыр менен Түштүк магистралдын кесилишинде көчө шыпырып жүргөн аялды унаа коюп кетип, ал ооруканага жетпей жан берген.

Сотрудница МП Тазалык, которая погибла в результате автонаезда на пересечении улиц Абдрахманова и Аалы Токомбаева
«Тазалык» ишканасынын унаа коюп кеткен кызматкери Айнура Султаналиева

Дөкөнов кырсык болгонго чейин бир саат эрте өзүнө тиешелүү аймактарын текшерип жүрүп, Айнура Султаналиеваны иштеп жаткан жеринен сүрөткө тартып алган.

«Мен эртең менен дайыма өзүмө тиешелүү объектилерди текшерип чыгам. Бүгүн да 6:30дарда кыдырып жүрүп Айнура эжеге жолугуп калдым. Байтик баатыр менен Масалиев көчөлөрүнүн кесилишин шыпырып жүрүптүр. «Күн жылыганга кумдар чыгып калыптыр, ошол кумду шыпырып, бүгүн бүтүрүп коем» деп адатынча берилип иштеп кетти. Бир жарым сааттан кийин телефонума чалышып эжени унаа сүзүп кеткенин кабарлашты. Барсак, Тез жардамга салып, бирок унаа жыла элек экен. Беш мүнөткө жетпей анын үзүлүп калганын айтышты«, — Дөкөнов.

Ишкана кызматкеринин айтымында, Султаналиева «Тазалыкта» Нарын облусундагы Жумгал районунун Миң-Куш айылынан келип иштеп жаткан.

«Ал бизде коомдук аймакты тазалагыч болуп 2016-жылдын аягынан бери эмгектенчү. Өтө жоопкерчиликтүү адам эле. Баягы катуу суукка карабай өз аймагында 6:30да болуп калчу. Аны менен кошо ишканабызда 30 жаштагы уулу да коомдук аймакты тазалоочу болуп иштечү. «Кызымдын кыздарын багам, тапкан акчам батирге кетип жатат» дегенинен 12-кичи райондон бир бөлмөлүү жатаканага жайгаштырганбыз. Сөөгүн соттук-медициналык экспертизага текшерүүгө алып кеткен. Эртең туулган жерине жөнөтүлөт го…», — деди Дөкөнов.»Тазалык» ишканасы каза болгон маркумдун жакындарына материалдык жардам көрсөтө турганын кошумчалады.

Бишкек милициясынын маалыматы боюнча, 60га таяп калган аялды Honda Elysion автоунаасын айдап бараткан 44 жаштагы тургун Түштүк магистраль менен чыгышты көздөй кетип баратып коюп кеткен. Айдоочунун мас эместигин наркологиялык кароо тастыктаган. Учурда кырсык боюнча тергөө жүрүүдө.

Үч жылда Бишкекте жол кырсыгынан «Тазалыктын» 6 кызматкери каза болуптур.

Булак/sputnik.kg/

Добавить комментарий

Ваш e-mail не будет опубликован. Обязательные поля помечены *