Жогорку Кеңештин депутаты Наталья Никитенко «Фейсбуктагы» баракчасына Министрлер кабинетинин Бишкек Жылуулук электр борборуна көмүр алып келүүнү казакстандык компанияга берүү тууралуу тескемени чыгарды. Ал тескемеге ылайык, «Электр станциялары» акционердик коомуна таандык Бишкек ЖЭБдин от казандарын тейлөө милдети да көмүр алып келе турган Hampton Resources Limited компаниясына берилет.

Президенттин расмий сайтына бул маалыматты тастыктаган түшүндүрмө чыкты.

«Президент Садыр Жапаровдун Бишкек ЖЭБине көмүр жеткирүүдөгү коррупциялык көрүнүштөрдү жоюу максатындагы тапшырмасын ишке ашыруунун алкагында, абага чыккан зыяндуу заттардын көлөмүн төмөндөтүү жана борбордогу экологиялык кырдаалды жакшыртуу, кара түтүн боюнча кырдаалды чечүү, ошондой эле 2021-2022-жылдардагы күз-кыш мезгилинен ийгиликтүү өтүү максатында Министрлер кабинети бир катар натыйжалуу чараларды көрүүдө», — деп айтылат расмий маалыматта.

Акылбек Жапаров Министрлер кабинетинин төрагасынын орун басары, Экономика жана финансы министри болуп турганда Экология боюнча мамлекеттик комитеттин башчысы Динара Кутманова менен биргеликте Казакстандын Караганда облусунда иш сапары менен болгон. Ал жакта иштеп жаткан көмүр шахталары жана байытуучу комбинаттардын ишмердүүлүгү менен таанышкандан кийин «Ко» маркасындагы көмүрдү алуу сунушталганы кабарланды.

Баш кеңсеси Лондондо жайгашкан Hampton Resources Limited компаниясынын атын атагысы келбеген өкүлү «Азаттыкка» бул маалыматты тастыктады.

«Ооба, биз ушул күз айларында Кыргызстанга ири өлчөмдө көмүр жеткирдик. Бирок, учурда кыргыз тараптан көмүрдүн сапаты туура келеби, келбейби тастыктоо күтүп жатабыз. Азырынча комментарий бере албайм».

Аталган компания Карагандадан көмүр ташыйт. Депутат Никитенко жеке менчик чет элдик компанияга мындай стратегиялык маанилүү объектини берүү чечимин сынга алды.

Никитенко казакстандык Hampton Resources Limited компаниясы Кыргызстанда биринчи ирет пайда болбогонун, жыл башында, январь айында ошол кездеги вице премьер-министр Равшанбек Сабиров компаниянын өкүлдөрү менен жолукканын да жазды.

ПИКИР КАЛТЫРЫНЫЗ

Please enter your comment!
Please enter your name here