Нарындын Солтон-Сары кенинде ушу тапта 500дөй адам чогулуп турат. «Азаттыктын» кабарчысы маалымдагандай, алар кытайлык компаниянын кызматкерлеринин чыгып кетүүсүн талап кылууда.

Чогулгандар менен сүйлөшүүгө облус башчысы Аманбай Кайыпов барды.

4-августта ал жерде отузга чукул малчы чогулуп, кытайлык компаниянын өкүлдөрүн айыптап, «күнөөлүүлөр мыйзам чегинде жазасын алсын» деген талап коюшкан.

Чогулгандар менен жолуккан Нарын районунун акиминин орун басары Жаныш Ибраимакунов окуяга укуктук баа берилерин айтты.

Ал эми Солтон-Сарыда кен комбинатын куруп жаткан кытайлык «Жоржи Майнинг» компаниясынын жергиликтүү эл менен иштешүү бөлүмүнүн адиси Малик Камилов териштирүүнүн жыйынтыгы менен компания жоопкерчилик тартууга даяр экенин билдирген.

3-августта Солтон-Сарыда кен иштеткен компаниянын өкүлдөрү менен жергиликтүүлөрдүн ортосунда чыр чыккан. Чатактан Оттук айылынын эки тургуну жабыркап, ушул тапта Нарын облустук ооруканасында жатат. Ал эми кытайлык компаниянын 12 өкүлү Нарын райондук ички иштер бөлүмүндө сурак берүүдө. Булак: Азаттык.