КТРКда кайрадан чуу. Тактап айтканда буга чейин бир катар алдыңкы телеканалдарда иштеп, коомчулукка аздыр-көптүр белгилүү болуп калган Чынара Токонова аттуу журналисттин КТРКнын башкы директору Илим Карыпбековдун орун басары Жылдыз Жумабекова тарабынан моралдык кысымга алынып жумуштан алынганын, ошол күндөн тартып Чынаранын  кан басымы жогорулап, учурда Бишкектеги неврологиялык ооруканада жатканын журналисттин апасы айтып чыкты. Мына ушул чуулуу маселе боюнча биз айрым журналисттердин ойлорун уктук…

Олжобай Токтосунов, журналист:

Бул окуя өтө жагымсыз окуя. КТРКнын жетекчилигинин Чынарага карата мамилеси моралдык юридикалык жагынан да туура эмес. КТРКда жетекчиликтин гана айтканы айткан, дегени деген принциптин орноп калганы өкүнүчтүү. Чыгармачыл адам өтө назик болот. Аларга аяр мамиле керек. Чынаранын тез сакайып кетишин тилек кылам.

 

Чынара Капарова, КТКРнын мурдагы кызматкери:

Илим Карыпбеков өзү жазган эле, “Эки жүздөй кишини  ар башка себептер менен иштен алгам, аларга жакшылыгым да, жаманчылыгым да жок” – деп. Жетекчи мыйзам бузуп иштен алып жатса, кайсы кызматкер болбосун психологиялык кысымга тушугат. Ал ооруга алып келет. Мындай нерсе менин да башымдан өттү. Азыр дарылануум уланууда. КТРКга кайра барып иштесем жыгылып калаарымды билип турам. Анткени КТРКнын жетекчилиги мени кайра ишке алам деп көкүрөк какканы менен тымызын куугунтук  болоору турган иш. Кесиптешим Чынара жакшы иштеген, жакшы журналист кыздардын бири эле. Чынарага кысым кылган орун басар Жылдыз Жумабекова убагында мага да кысым кылган. Жетекчи Илим Карыпбеков кызматкерлерин баалап, кетүү арызын жазганда аларды чакырып, эмне себептен арыз жазып жатканын сурашы керек эле. Жетекчилер биригип алып өз билгенин кылып, КТРКны жеке менчигиндей башкарып жатканын көрүүдөбүз…

 

Назгүл Мамытова, “Ачык Саясат” гезитинин редактору:

Мындай проблема жалгыз эле КТРКда эмес, бардык мекеме-ишканаларда, бардык эле редакцияларда бар. Бир эле КТРК ушундай абалда болуп жатат деген туура эмес. Чынара Токонованы мен тааныбайм. Болгон чындыкты ал өзү гана айтып бериши керек. Эмне себептен иштен кетүү боюнча арыз жазган, ким түрткү болгон деген сыяктуу. Ошондо гана чындык чыгат. Ошол себептүү мен кесиптештердин ызы-чуусун талдай албайм. Иштен кетирүү боюнча кысымдар жеке менин башымдан деле өткөн. Албетте жаман көрүнүш. Ден соолугуна терс таасирин тийгизет. Жылдыз Жумабекова менен Чынара Токонова өз чындыктарын айтышы керек деп ойлойм.

 

Үмүт Мукамбетова, “Үмүт ТВ” телеканалынын башчысы:

-Бул жанылыкты мен кечээ социалдык тармактардан окудум. Буга чейин КТРКда  мындай көрүнүштөр көп эле жолу болгон десем жаңылышпайм. Болгону элге билинбей, жабылуу бойдон калчу. Азыр интернет деген бар. Кандай маселе болбосун, ачыкка чыгып кетиши мүмкүн. Кесиптешибиз  Чынара Токонованы жакшы деле билбейм.  2006-жылдары өлкө башчысын коштогон журналист катары тың жана так иштегенинен маалыматым бар. Ал эми КТРКдагы жагымсыз окуя бардык эле редакцияларда болуп турат. Негизи эле журналисттик кесипте көп пикир келишпестиктер жаралат. Бул жерде бир гана калыс сөз, ошончо жылдан бери жан дили менен иштеп келе жаткан кызматкерге түшүнүү менен мамиле жасап, өмүрүнө, жашоосуна зыян келбегидей кылып эле маселени чечип коюшса болмок. Чечилбеген, кечирилбеген эмне бар? Адам өмүрүнө себепкер болгон жагымсыз нерселерди деле кечиришип, чечишип жатышпайбы. Андыктан орозонун улуу күнүндө эки тарапка тең кечиримдүүлүк каалайм! Чынаранын сакайып кетишине КРТК жетекчилиги жардам бериши керек.

Булак:Фабула

ПИКИР КАЛТЫРЫНЫЗ

Please enter your comment!
Please enter your name here