Орусияда Мамлекеттик думанын мурдагы депутаты Леонид Маевский “Альфа-банктын” кожоюндары Михаил Фридман жана Петр Авенден 50 млн. долларды опузалап алган деп айыпталып жаткан маалым болду. Аты аталган ишкерлер жабырлануучу катары таанылганын «РИА Новости» иштин материалдарына таянып жазды. Тергөөнүн документинде “Маевский ишкерлерди жаманатты кыла турган маалыматты ачыкка чыгарбаш үчүн 50 млн. доллар талап кылганы” белгиленген. Бирок кандай маалымат тууралуу сөз болгону белгиленген эмес. Маалыматка караганда, Маевский ар бир жабыркоочу менен 2018-жылдын 31-октябрынан 12-ноябрына чейин кафе-ресторандарда өз- өзүнчө жолуккан. Алардын кимиси менен биринчи жолукканы да көрсөтүлгөн эмес.

Маевскийге карата кылмыш иши 2018-жылы 14-ноябрда козголуп, эртеси күнү камакка алынган. Анда жабыркоочунун аты аталган эмес. Кийин анын басма сөз катчысы Максим Букин да камалганы маалым болгон. Орус сайттары жазгандай, бул айып менен Маевский 15 жыл абакка кесилиши ыктымал.